ДРЕВЛЕПРАВОСЛАВИЕ. Форум старообрядцев всех согласий

СОБРАНИЕ ОТ СВЯТОГО ПИСАНИЯ И ЖИТИЙ СВЯТЫХ
ДОПУСТИМО ЛИ во время нужды благочестивыя ради нашея христианския веры от гонителей себе смерти предати

... сей путь спасительный и богоугодный, еже во время нужды благочестивыя ради нашея христианския веры от гонителей себе смерти предати — во огнь, или в воду, или инако некако, — паче же с немощными сиротами, и с престарелыми, и маловозрастными отрочаты, немогущими никако укрытися, ниже от мучительских рук страдания и томления терпети; боящежеся паче смерти телесныя, еже от Господа нашего отступления, и душевныя и вечнопребывающия смерти. Еже како бы от любви Божия, благочестивыя нашея христианския веры не отпасти; якоже древле святии во времена мучительства, любве ради Христовы, и благочестивыя ради нашея верыпострадаша, изволяху себе смерть паче, нежели окаянен живот, во отпадении от любве Божия пожити, якоже нам возвещают божественныя книги.

Сентября в 3 день, в житии священномученика Анфима, епископа Никомидийскаго, пишет: в тоже время, к тягчайшей скорби христианом, вещь прилучися сицева: неведомо откуда зажгошася палаты царския и велика часть их сгоре, еже злочестивии на христиан возложиша, глаголюще: яко христиане от ненависти запалиша; тогда ярость царева распалися зело и паче зверя люта возрыка, пожирая христианы, их же великия громады мечами посецаеми бяху, онии огнем зажигаеми; но и сами от верных мнози Христовою любовию разжегшеся, яко в некую прохладу, во огнь себе вметаху.

Октября в 4-й день в Пролозе пишет: святыя мученицы Домнины и дщерей ея Киринеи и Проскудии; сия жены, божественною ревностию подвигшеся, и оставльше домы и сродствия, в землю чужу преидоша, и тако бежавше, достигоша Едес; и тамо ходящим тем, внезапу ста муж и отец, воины имуще, к зачало вратом доспевше и яша я, и доидоша в Ераполь. Река же течаше путем, им же идяху; они же, утаившеся от воин, ядущим им хлеб, и молитву сотворше, наскоре внидоша в реку, вдашася струям водным, и тако скончашася, — разсудивше, яко любве ради Христовы лучше есть водою утопитися, нежели беззаконным в руце вдатися.

Марта в 22 день, в Прологе, святыя мученицы Дросиды, дщери Трояна царя, тако пишет: Таковому же повелению изшедшу, и слышавша сия раба Божия Дросида, яко кождо от христиан, веры ради и любви Христовы, вревают сами себе в пещь, — и прочее чти, иже да тамо смотрит пространнее.

Месяца августа в 1-й день, — о Моккавеох и матери их Соломонии, пишет, на конце слова, сице: Мати же их Соломония, понеже скончавшихся онех виде. и не стерпевши рук человеческих нападения, помолившися и в разжегшуюся сковраду себе вверже, и тако Богу дух предаде.

В Гронографе повествуется, в царство греческое Льва Исаврянина, страдание преподобномученицы Феодосии девиды. Ревностию же божественною разжогшеся, честныя и преподобныя жены: Феодосия девица, и Анастасия Патрикия и инии, опровергше лествицу на землю, низверзают окаяннаго, и влекуще, смерти предаша; и вшедше в церковь, злочестиваго патриарха камением побиваху, наемника наричуще, а не пастыря. Он же возвещает царю таковая. Злочестивый же Лев повеле вся мечем изсещи: и мнихи, и иерея, и многие простца умучи и смерти предаде; инии же благочестия ради сами предавахуся смерти; друзии же в пустынях крыяхуся.

Октября в 24 день, в житии святаго мученика Арефы повествует, како младенец от рук жидовина исторжеся и во огнь скочи к матери своей, — списатель глаголет: и бысть мати с сыном жертва и всесожжение благовонно Богови, — слава Богу, умудрившему тако малаго младенца.

В Книзе Царственной поведает сице: рязанская княгиня благоверия ради с сыном своим Феодором заразилася о землю с высокаго крыльца, от Батыя царя.

И не точию благочестия ради мнози сице пострадаху, но и целомудрия ради и чистоты не мали себе смерти предаша, изволяюще умрети паче, нежели церковь тела своего осквернити; их же церковь Божия приемлет и прославляет, якоже поведают нам священныя книги.

Октября в 15 день, в житии Лукиана пресвитера, великия Антиохии, пишет: глаголю же, яко некая девица, именем Пелагия, ученица Лукианова, егда веры ради Христовы на мучение бысть послана, боящеся, да не насиловано будет девство ея, скачи от высокаго окна и, падши, разбися, и умре, юже вернии с мученики почтоша."