ДРЕВЛЕПРАВОСЛАВИЕ. Форум старообрядцев всех согласий

Скрытый текст

Глава 1

О исповедании православныя веры вкратце

Неключимый раб пресвятыя и животъворящия и неразделимыя Троицы, Отца и Сына и Святаго Духа, единаго истиннаго Бога, юзник по вере и церкви Христове и поборник благочестивых отеческих догматов [протопоп Аввакум возлюбленным] свя-тым братиям сионьским чадом, всем православным Хри-стианом афетороссийскаго рода радоватися и умудрятися, вкупе же и здравствовати в непорочней вере Спа-сителя Господа нашего Исуса Христа Сына Божия, воспитоватися и возрастати во святых благочестивых отеческих догматех кроме всякия еретическия скверны и порока.
Молю вы, чада церковная, и коленом вашим касаюся, аще обретох пред вами благодать, помина[й]те мя в молитвах своих, да даст ми ся слово проглаго[лати] устом моим на сопротивника Божия и на отступники благочестиваго стараго нашего православия. Не буди ми похвалитися, истинну бо реку. Яже аз вся священная божественная писания проидох, ветхая и новая, а не обретох нигде же, что в последняя времена испра[ви]ти веру добре и обрящут истинну. Несть! Несть! Но вси пророци и апостоли Христовы и учители и вси святии отцы вопиют согласно Христу, истинному своему пастырю и учителю, яко в последняя времена востанут лжехристи и лжеучители и священная писания исказят и [п]ревратят и отступят от веры, и внесут ереси погибелныя и Христа Бога истиннаго креста отметатися будут, Духа Святаго похулят и вся отеческая предания превратят и писания святых загладят и по своей похоти начнут писати. Изменят бо времена и закон беззаконнующий и завет наведут с прелестию и осквернят священие и пр[е]ставят учащение и дадят вне огнушение скажено. И не будет святыя службы во олтарех, ни приношения истиннаго, яко вси уклонятся от Бога святаго и лестцу веру имут. И даст прескверный вместо креста Спасителева подобно свое знамение. Тако есть писано во святых кн[и]гах «и прелестнику поклонятся живущи на земли и, — по писанию Богословлю, — их же имена не написана суть в книгах животных». Чтый да разумеет и блюдет ризы своея, да не наг ходит. Время бо сие люто зело.
Написах сие краткое писание от болезни и туги сердечныя. Видех многих зрящих и не видящих, уши имущих и не слышащи, и зде имеяй уши слышати, да слышит с великим вниманием. И смотри всяк правоверный внедреманным оком и внимай разумно и блюдися зело от ложных и своеумных мудрований и по апостолу: «вся искушающе, доброе содержите и от всякия злыя вещи отгребайтеся, яже врежают душа наша». О них же и правила святых отец возбраняют: «Аще кто и мало что отметает от закона — весь отме-тает закон», но аще и мало нечто. Аще и худое что подвигнут — анафема да будет!

Глава 2

О изменении благолепоты церковныя и о развращении книг

Господу попустившу за наше согрешение — злый пастырь быв во овчей кожи волк Никон патриарх в лето от создания мира 7161. Сый еретик изъмени святый чин и развратил святыя книги и благолепоту святыя церкви опроверже и нелепыи раздоры и чины во святую церковь внесе от различных ересей и зело огорчив церковь Божию, общую матерь нашу, и осквернил догматы незаконными, преложив истинну во лжу и почтоша беззаконие в закон. И не токмо святыя книги пременил, но и весь чин церковный и устав святых отец преданный. Первое: на освящение церкви святый престол; 2 — антимис; 3 — истинный крест на просвирах; 4 — амбон; 5 — посох; 6 — шапку, вместо ея кидарь возложили; 7 — иноческий чин исказили, парамон и камилавку, и благоговения и страха Божия клабук изменили. Парамон и к[а]милавку накладывают и благословляют обема рукама, не по преданию святых отец, но некако странно; 11 — велят креститися щепотью: тремя персты; 12 — в молитве «Сына Божия» не велят говорить; 13 — тресвятую ангельскую песнь «аллилуия» четвертят; 14 — во ис-поведании православныя веры в символе «Духа Святаго истиннаго» не имеют. Сии на крещении в молит-ве говорят: «Молимся тебе, дух лукавый»; 16 — печать на миропомазании: таиньства христиа[н]скаго стихи отставили; 17 — на крещении же и венчании ходят вкруг и обращаются на шуюю страну и се образуют, отводят людей от десныя страны, еже есть от Бога, и на шуюю уклоняются, еже есть ко дияволу; 18 — во исповедании и покаянии молитвы многия отставлени прощальныя и разрешальныя; 19 — вся службы церковныя; вечерню и павечерню и полунощницу и заутренню, и часы, весь чин и устав нарушили; 20 — во святой и божественой литоргии в действе и в молитвах и во ектиниях все превратили; [21] — молитвы причастныя и по причастии многия отставлены; [22] — и две просвиры отложили; [23] и истинный трисоставный животворящий крест Христов от агньца Божия отняли и закалают агнец неправедный. И отнюдь православному христианину служения их не подобает причащатися и атидору их приимати, суетно бо их кадило и мерзостно приношение, понеже бесом жрут никонияне, а не Богови. Страшно бо некое чаяние суда и огня ревности поясти хощет сопротивныя. Писано бо есть: «отвергийся кто закона Моисеова, без милосердия умирает при двою или триех свидетелех». Колико мните горшия сподобится муки, Сына Божия поправый и кровь завета, ею же освятися скверну возимевый и Духа благодать укоривый. Вемы бо рекшаго: «мне отмщение аз воздам». Глаголет Господь: «страшно есть впасти в руце Бога жива».
И аще дерзнули изменити отеческия предания, благолепоту церковную, сице и всю нашу православную веру нарушили, и книги все печатныя и писменныя похулили, испревратили и перепечатали на свой разум богопротивно. Не токмо святыя книги изменили, но вся речи, силы и имена преложив на странныя пословицы. Глаголют бо Исуса Христа — «Иисусом», Николу чюдот[ворца] — «Николаем», великомученицы Парасковии — «Параскева». Да многим святым имена преложили и пременили, да терпит им Христос свет и Никола чюд[отворец] до суднаго дне, тогда им весь указ будет. Не подобает бо своего языка уничижати, а странными языки украшати рещи. В православных старопечатных книгах: «вó имя», а в новых: «во имя»; в старых: «iзрáиль», а в новых: «исраиль»; в старых «веком», а в новых: «векóв». Малое бо сие слово велику ересь содевает. Кирил святый пишет: «посмотри, любимиче, и просодиих и запятыя и на точки». И вся силы изъпревратили и изменили на странныя пословицы. И вся чины церковныя и мирския обычаи и вещи. И мой ответ сей есть, что те новыя их книги подобны оным, иже в пустыни чюждь огнь принесшим в храм Свидения Господня, им же Бога прогневаша и погибоша за сие 14700 и прочая земля пожре, чюждь огнь Господь не прият и принесших погуби.
Чтый да разумеет, а слышавый да блюдется. А прочих церковных раздоров и смущения и хулы изменения и превращения чином и уставом, мно-жества ради, невозможно есть ныне мне писати. Да слышит паки святаго Иоанна Златоуста: «человек той, иже догматы страшны погубляя, сего греха мученическая кровь загладити не может». (Вера, лист 198). Но аще мы или ангел с небеси благовестит вам паче, еже благовестихом вам, анафема да есть.

Глава 3

О обличении отступления и казни Божии и о лютом томлении и мучении

Слышал ли еси страшное прещение, видиши ли изменение, разумееши ли во всем развращение, о июдею новый? И почто ратуешися со Христом Исусом, низлагаяй благодать и воставляи ветхая, яко же древний Оулиян царь, покушаяшеся низложити Христов крест трисоставный истинный животворящий, и сень законную — четвероконечный крест — почитает паче истинны. Паче же рещи не сень, но крыж латынский, умысл диявольский. Аще вещь и такова же образом, якову церковь содержит на ризах и пеленах, но разньство велие и заблуждение в вашем разуме: приимите без зазора промысл и о костеле тем, яко Иоулиян царь — о Святая Святых. Прииде ваша година и область темная, даже той же огнь искочиста и пожжет ваша душа и телеса, яко и при Оулияне Отступницы, на отцы ваши жидовы, видете ли, не менше зде тогдашнаго наказания казнь и гнев Божий за развращение веры православныя и изменение благолепоты церковныя. С начала бляди сея нововводныя, пагуба была всемирная при нашем зрении: мор[о]м во всю землю Русскую, во 162-м году и во 163-м году во градех и селех пусто зделал Бог, таже кровопр[о]литие с польским, таже междуусобие с Раз[и]ным на Низу и иных погубиша. Несть время изъчести уму моему и по се число, яко же звезд небесных и яко каплей дождевых, толико пало глав человеческих. Еще же за ваши прилоги колика зла в Русии учинишася — пожары и иные безчисленные гневы и беды, громы страшныя и молнии и камение градное с небесе нисходящу, человеки убивающее, во обличение отступников, изменяющих предание святых отец. А церковное раздрание и развращение повсюду и народу вселюдску тягота великая и нужда. А пребывающих в законех отеческих подвигше гонение велие и разорение. Многия убо святыя места и обители ученицы никоновы разориша. И непокаряющихся ложному и неправому учению многих злою смертию замориша, а иных в дальныя ссылки заточиша и в темницах замориша. А иных многое множество огню и мукам разным предаша: преосвященнаго епископа Павла, священнопротопопа Даниила, и священнопротопопа Логгина нужной без вести смерти предаша, священномученика Гавриила огнем сожгли священномученика Михаила без вести казниша, священника Полиекта и с ним 14 человек сожгли, старца Аврамия и Исаию Салтикова, сих на Колмагорах, Иоанна юродиваго сожгли в Боровске, Евдокима и Петра без вести казнили, инока Варлаама, инока Пахомия, инока Филиппа, инока Епифания, инока Иоасафа сожгли. В Нове граде тамо же белцов — Федора, Луку, Карпа, Логина, Гавриила, Василия, Анания и Александра, Димитрия, Иоанна, Лаврентия и иных многих огнем сожгли. Там же Григория, Иосифа, Епимаха, Евфимия, Андрея главы отсекли. Родион и Трифилий и Самсон много мук страдаша и зле умориша. В Володимире сожгли 6 человек, в Казани 30 человек.
А по Волги и безчисленое многое множество прижгли и муками замучили и в темницах гладом замориша и прочим от них пра[во]верным горе, ох и увы, сотворяется и доднесь.
А инии ревнители благочестию закона Христова, уразумевше лесть отступления, да не прельстятся и погибнут зле.5 Блажен изволил (Так! Н. Б.) сей и ревность о Господе, за веру и за предание святых отец! Мы же, оставшии, о всех сих поминание творим жертвою, сокрушеним сердцем со слезами воспеваем, радующеся, Христа славяще: «упокой, Господи, душа раб своих, по-страдавших от никониян на всяком месте, учини их душа, иде же присещает свет лица Твоего и всели их со всеми святыми Твоими избранными, угождьшими Тебе, яко благ и человеколюбец». — Рабом Божиим, побиенным и сожженным всем православным християном вечная память
…духом своим, собирающеся во двор с женами и детьми и сожигаются огнем своею волею.

Глава 4

Наказание о терпении напастей и скорбей и о утешении вечном

Глаголет святый Иоанн Богослов во Откровении своем: «Здесь есть терпение и вера святых, иже соблюдают заповеди Божия и веру Исусову» и «блажении умертвии, умирающии о Господе». «Отныне ей, — глаголет Дух Святый, — да почиют от трудов своих вовеки». И разумеют, по писанию Богословлю во Апокалипсисе, еже рече: «видех под олтарем душа избиенных за слово Божие и за свидетельство Исус Христово».
И возопиша гласом велиим, глаголюще: «доколе, Владыко святый истинный, не судиши и не мстиши крове нашея от живущих на земли». И речено бысть им, «да почиют еще мало время, донде же скончаются клеврети их и братия их, хотящии избиени быти, яко же и тии».
Видите, любимии, вси страждущии за слово Божие и за свидетельство старопечатных книг! А то ожидает и нас! Господь Бог и избиенных утешает ризами белыми, а нам дает время ко исправлению. Дерзайте, вернии о Господе, смиренным Господь помощник. Потщимся, Господа ради, потщимся, любимицы, и неленостно подвигнемся, но потецем усердно ныне, яко время есть.
Душе моя, душе моя, востани, востани, что спиши? Остави вся яже зде временная и тленная и приимеши тамо вечная и нетленная вовеки. Попецыся, окаянная, убудися и воспряни. Задремала еси леностию и нерадением о правоверии, уснула еси сном погибельным в прохладах, пищах и питиях. Виждь, мотылолюбная, кто при тебе: боляриня Феодосия Прокопьевна Морозовых и сестра ея Евдокея Прокопьевна и Даниловых дворян Марья Герасимовна с проччими мучатся в Боровске в землю живы закопаны, гладом и жаждою тающе. По многих муках и пытках и до-мов своих и имений разорением, алчют и страждут. Такия столпы великия, им же не точен мир весь! Жены суть, немощнейшая чадь, а со зверем, поелику сила, борются. О чюдо, только лишь подивитися! Осмь тысящь крестьян имела и домовнаго заводу тысящь больше двух сот! Еще же и сына не пощадела. И другая такожде детей своих. На место позлащенных одров, в землю посажены, за правоверие страждут, глад и нужду терпят и мучатся за слово Божие и за свидетельство Исус Христово. И ты, душе, много ли при них имеешь? (Ниже) Оле безумная, не тако, но воспряни Христа Сына Божия света явственне. Блажени суть умирающии о Господе. «Блажени творящии заповеди его, да будет им область на древо животное и враты внидут во град небесный». (Ниже) Того ради всякому верному християнину подобает в милости Божии и в любви пребывати, в книжином прочитании, в словеси истинном и молитве прилежати и подвижну быти во всех делах, а не внимати льстивому миру сему.
Не стыдитеся, аще и поношают, аще и укаряют, аще и ненавидят, аще ли напрасньствуют и гонят и оскорбляют. Паче побеждай терпением, поминай присно Господню заповедь. Рече во Евангелии «аще мир вас ненавид[и]т, ведите, яко мене прежде вас возненавиде, аще мене изгнаша, и вас ижденут». И сего ради нам со усердием и верою надобно терпети, а Божию помощь призывати
Коли же кто изволил Богу служить, не подобает ему о себе и тужить, и за вся предания церковная крепко стоять, не токмо за изменение святых книг, но и за мирскую правду подобает ему душа своя положить, яко же святый Иоанн Златоуст за вдовицу и за Феогн[о]стов и проч.

Глава 5

Поучение о терпении, яко подобает с радостию тщатися на вечный покой, и проч.

Молю убо вы, аз, юзъник о Господе, всех православных християн, страждущих за имя Божие и за веру и за крест Христов истинный и за догматы церковныя, потерпим мало зде от никониян всяку нужду и скорбь, да тамо от Бога мзду приимем и вечно с ним возрадуемся и возвеселимся. Ныне яко в зерцале и гадании, тамо же со Христом лицем к лицу. Ныне нам от никониян гонение и томление и огнь и струбы, и земля и топор, и страсть и смерть, тамо же утешение: ангельския песни и славословие, хвала и честь и радость и веселие вечное. Яра ныне зима, но тамо сладок рай. Белезненно ныне терпение, но блаженно восприятие. Слышите Господем реченное во Евангелии: «блажени плачющии, яко тии утешатся». И апостол учит: «многими скорбми подобает нам внити в царство небесное». «Не начен блажен и скончавый» и «претерпевый до конца, той спасен будет». Ныне время благоприятно, ныне день спасения. Всяк верный много не задумавайся: гряди со дерзновением во огнь и постражи с радостию Господа ради своего, яко добр воин и верный раб Исус Христов правыя ради веры Христовы и святыя церкви и предания святых отец догматов и за крест Христов. И мы с тобою же вкупе Бога моля и пречистую владычицу нашу Богородицу и всех святых уповаем: конечно не оставит нас Господь и Богомати и не прегрешат вси уповающии нань. (Ниже). Станем добре, братие, станем мужески, любимии, и не предадим благочестия нашего! Аще и покушаются никонъяне разлучити нас от Христа томлением и мукою и смертию, и мы паче ополчимся во броня веры терпением и упованием за Христа, и не оставит нас глава наша Христос, упование наше Христос и утвержение и прибежище и защищение наше Христос, и покровитель Дух Святый. И паки со апостолом речем: «кто ны разлучит от любве Христовы, скорбь или теснота, или гонение, или глад, или нагота. Или беда, или мечь». Яко же есть писано: «яко тебе ради уме[р]щвляеми есмы весь день. Вменихомся, яко овца на заколение, но о всех препобеждаем за возлюбльшаго ны, известихомся, яко ни смерть, ни живот, ни ангели, ни начала, ни власти, ни силы, ни настоящая, ни грядуща, ни высота, ни глубина, ни ина кая тварь возможет нас разлучити от любве Божии яже о Христе Исусе Господе нашем».
А ты, никониянин, покушаешися часть Христову соблазнити и разлучити и развратити в жертву с собою отцу своему дияволу привести. (Ниже.) «Пра-ведных душа в руце Божии» и проч. Всех правоверных наших, от вас, никониян, замученных, сожженных и посеченных, аще и помышляете во очесех безумных, что умерли и муку приняли и смерть безчестну, но с премудростию реку: «они же суть во умилении и упования их безсмертия исполнь». Вмале бо от вас пострадаша, тамо же великая восприимут от Христа Бога «яко Бог искуси их и обрете их достойны себе, яко злато в горниле искуси их в вашей пещи, и яко всеплодну жертву прият их во время посещения их, возсияют и яко искры по стеблию потекут» и судити вас станут и обладают вами, ворами, яко «воцарится Господь в них вовеки. Надеющий на Христа света разумеют истинну и вернии любовию пребудут в нем, яко благодать и милость на преподобных его и посещение во избранных его».
Ей, «радуемся, хвалимся в скорбех сво-их», гонимы и мучими от вас, никонян, в заточених и в темницах, во оковах и в смертех, многащи от вашего жалованья. «Иногда наг, иногда гладен, иногда убит, иногда на дожди, иногда на мразе, иногда на цепи и в крепи, кроме повседневных нападений и разлучений жены и детей. Кто изнемогает? И аз не изнемогаю, не разжизаюся», но терплю о Христе Исусе, упования ради будущих благ вечных.
А ты, никониянин, чим хвалишися, скажи нам, разве антихристом своим да мучением и томлением, да огнем и топором. Нужною смертию уморити той вас научил з дияво[ло]м и воор[у]жил на Христовы рабы. Богати вы тем и силны. Да кто прежде так делал от святых, кроме гонителей нечестивых царей и мучителей и ере-тиков? Сердиты были и жиды те, яко же и вы, они убо Исаию пилою претерли Иеремию в кал тинный вверзили, Науфея убили, Захарию главу отрезали, напоследок и самого Христа Сына Божия на кресте распяли и копием ребра его прободоша. Тако же и по нем апостолов его различно умучили. Почтите то. И вы не менше их беды той наклочили, колко уже людей тех примучили и огнем приж[г]ли и прирубили, мняся службу приносити Богу. И нам, правоверным, гораздо любо, что Руская наша земля освятилася кровию мученическою. Подвизайтеся гораздо, якоже гармен. Подклоняйте под мечь и огнем непокоряющихся в новую веру вашу, (Ниже.) Сами суще заблудили и отступили от истинныя веры с Никоном отступником злокозненным пагубником еретиком, да бросились на тех, кои обличают и правду говорят. Буди в том Бог праведный судия меж нами и вами, за что кровь наша проливается. И клевещете на нас напрасно. Ей, ей, аминь.

Глава 6

О измененении благолепоты церковныя и ограблении престола и о снятии святаго анътимиса и прочая

Несть радоватися чадом, егда видят отца своего любим[а]го страждуща и матерь свою болезнену и рыдающу и плачющу лишения своего утешения и красоты и радости. Тако больно нам и жалостно, что матерь нашу любимую, святую церковь, ограбили, яко царицу от порфиры благолепия своего обнажили, изменили чин и предания святых отец и святыя книги и веру нарушили. Да еще мы же бы и молчали! Но не молчим никако же воровству их, никониян, и по смерти своей, яко же Авелева кровь и Захариина и глава Крестителева, та же и мы вопием.
Слыши небо и внуши земле, и вы, светило небесныи, солнце и луна со звездами — вы будете свидетели нашей крове, изливающейся за правоверие. Только на нас великая вина, еже держим святых апостол и святых отец предание неизменно во сем стоим и побораем за святую соборную и апостольскую церковь, за истинный крест Христов, за непорочный символ православный, за истинное сложение перстов в знаменовании крестном, за трисвятую аллилуию, и за вся седмицерковныя тайны. Еще же и прежде бывших православных царей и патриархов московских Иова, и Ермогена, Филарета, Иосафа, Иосифа и всех руских святых служебники и потребники и прочия святыя книги, они нам оставили после себя. За них же мы ныне стражем и душу свою полагаем и умираем, и кровь свою проливаем. Святии апостоли и святии отцы 7 соборы и прочии пастыри и учители о Святем Дусе церковь святую исполнили догматов и украсили ю яко невесту, и кровию своею со Христом запечатлев, нам предание оставили. А антихристова чада и разграбили зело люте, обезчестили и испревратили и огорчили учением своим. Бесятся и играют, кой что захватил, той, что беси, то себе и потащил.
О святей церкви Божии святый Иоанн Златоуст глаголет: «Церковь есть земное небо, в ней же ангели невидимо славят Бога с человеки. Воображена есть самем Господем нашим Исусом Христом, апостолы основана, мученики совершена, святители преподобными окрашена, кровию и водою Христовою освящена, Духом Святым очищена. Стены же ея яже от собрания верных всех составлена и церковию наречеся, ибо церковь имя не разделение, но соединение и согласие имя есть. Ей же по всей вселенной единой достоит быти, аще и месты многими разделяются.
Катихисис большой. Глава 28, стих 9. «Церковь Божия — собрание всех верных Божиих, иже непоколебимую держат единую православную веру и в любви пребывают, облобзают учение евангельское и апостоль-ское непоколебимо, и иже суть достойны приимати святыя и божественныя совершенныя тайны, и иже суть под единою главою — Господем нашим Исусом Христом», и прочая.
Кирил Иеросалимский: «уне бо—рече—небу и солнцу изменитися, нежели церковным правилом в чем изменится, понеже церковь словом Божиим утвержена». Слово Божие на небеси и земли крепчайше. Яко сам Христос рек: «небо и земля преидет, словеса же моя не преидут». Ты же разумей, ибо Духом Божиим утверженая церковь не требует дний и месяцы пременити и во всех своих преданиих стоит непременно и един устав и предания держит до скончания века.
Тако же апостол Павел рече: «Молю вы аз, юзник о Господе, достойно ходити званию, вне же звани бысте, со всяким смиренномудр[и]ем и кротостию з долготерпением терпяще друг друга, любовию тъщащеся блюсти единения духа в союзе мира. Едино тело, един дух, яко же и звани бысте во едином уповании звания ва-шего». Един Господь — едина вера, едино крещение, един Бог и Отец всех, иже надо всеми и всеми и во всех нас.
Святый Игнатий Богоносец пиш[е]т: «наказую вы, яко да единыя веры и единыя проповеди и единаго причащения, сиречь святынь Господних причастии да бывайте, зане едино тело Господа Бога нашего и Спаса есть и едина кровь излиянная за нас, един хлеб за всех ломимый и едина чаша всем есть даема во остав[л]ение грехов и в жизнь вечъную». Паче сего свидетелства несть. Потреба явственейши показати, яко един Господь наш, едина глава, едино тело, сиречь святая церковь, едина есть вера, Христом с небесе принесенная, изо уст его пресвятых и из ребр истекшая, и пролитием крове на кресте церковь Христу обрученная и по се время на востоце благочестию его непорочно и нерушимо пребывающая. И нам, русияном, по благодати Божии святым апостолом Андреем Первозванным и от истинных наместников его патриархов цареградских преданная. По разсеянии всех ересей, в целости пребывающая от крещения Великаго Владимера лет 7 сот до Никонова патриаршества и ученик его нерушима и непоколебима стояла. Той бо окаянный Никон и прельщенныи от него, вселенную всю возмутивше, оставившей пресветлый свет свой, а тму прелести себе возлюбивше, заблудивше от истинныя веры и благолепоту церковную опроверже и вся догьматы и уставы отеческия преврати. И зело огорчи церковь Божию, общую матерь нашу и обезчестил и разграбил. Един вор за главу невесту Христову хватил и венец богоукрашенный сорвал, еже есть древо жизни и спасения, честный и животворящий крест трисоставъный возненавидели и сняли, и вместо того поставили крыж латынский и почитают паче истиннаго и кланяются.
А иной кобель борзой святый антимис с престола сорвал, на нем же животворящий и спасительный крест Христов трисоставный же и мощи святых, а вместо того литон устроил и положил наверху.
А круг церквей ныне ходят противу солнца на шуюю страна обращаются, и то их явное отступление, что оны от десницы, еже есть от Бога, отходят и к шуйце возъвращаются, еже есть ко отцу своему дияволу приходят.

Глава 7

О истиннем и животворящем кресте и славе его. Свидетельство от святых писаний и обличение противным

Великий святый апостол Павел, сосуд избранный Христов, к Галатом пишет: «мне же да не будет хвалитися, токмо о кресте Господа нашего Исуса Христа». Великия бо и дивныя и страшныя уразумев креста Господня, на нем же распят бысть Господь наш Исус Христос и разори силу дияволю и мучительство смерти, спасение же верным дарова, и славою его утешаетъся и всем верным християном того же желает и утешается, яко крестом вси дары Святого Духа верным подаются. Крестом разрушися держава смерти, ад сокрушися и Адам оживлен бысть. Крестом рай затворенный отверзеся, вся вселенная освятися, прелесть упразднися и вси языцы от восток солнца до запад, от полудне до полунощия во едину церковь и веру едину и едино крещение совокупишася и любовию связавшеся и от неволи бесовския свободившеся. Крестом назнаменовахомъся Христовы овцы и чада Божия быхом, о нем вси святии к Богу приведени быша и спасошася. Тако и церковь поет: «крест — хранитель всей вселенней, крест — красота церковная, крест — царем держава, крест — верным утвержение, крест — ангелом слава, крест — бесом язва». В Соборном уложении царя Ивана Василиевича, книга Стоглав, слово 41: «на святых церквах ставити кресты» — указ по древнему закону. Тако да пребывают неподвижно впредь, яко же ныне убо водружен бысть и поставлен святый крест благочестивым царем Иваном на соборней церкви пречистыя Богородицы на позлащенном версе, яко же есть воздвизательный крест, им же благословляют. И тако достоит быти на славу Божию и впредь на умножение лет благочестивому царю. А от своего бы замышления ничто же не претворяли, кроме церковнаго предания. Святый Иоанн Дамаскин глаголет: «иде же есть истинный крест Христов, тамо и Христос, а где несть истиннаго креста, тамо несть и Христа, понеже во едином теле не могут две главы быти». И паки апостол Павел в 1-м послании Коринфянам глаголет: «да не испразднится крест Христов». Тако же и святый Григорий Богослов глаголет: «да не истощится крест Христов». Истощение есть креста Христова — изменение совершеннаго образа его. Зри всяк правоверный.
Почто новыи учители изменили и истощили крест Христов? О них же Павел апостол, плача, глаголет: «враги их быти креста Христова», яко испразднили и истощили крест Христов, еже истинныей совершенный образ его изменили. Молю вас всех, правоверных християн, держати вся церковная предание святых отец неизменно и благословен будеши Богом вышным и нами грешными, и не предвигай, сиречь не пременяй вещей церковных, яже положиша отцы святии. Слышите, яже глаголю: еда будет истинный крест Христов тричастный на главе церкви и на престоле, и на просфирах, и на иконах и повсюду в поклонение непременно. Держим же и четвероконечныи в церкви, по преданию святых отец, на ризах и н[а] стихирарях, и на патрахилях, и пеленах и на поручнях. А иже учинив его на просвирах или на нем образ распятаго, таковый мерзок есть, изринути его подобает. Явно убо обманул диявол русских бедных людей, явно идут в пагубу. Слепыя вожди слепых и льстят! Римскую блудницу возлюбивше — четвероконечный и широкоперый крыж латынский паче истиннаго креста почитают, пишут и распятие без подножя на нем. И на жертве, сиречь на просвире положили крыж латынский, а Христов презирают, и от агньца Божия разлучают. Аз верую крепко святым пророком и апостолом и богословцем, яко от трех древ: от кипариса, и певга и кедра сотворен бысть крест Христов и доску с надписанием и возглавие над главою оставиша. О том святый Епифаний Кипрский пишет. А без возглавия — Петров с колодкою, а не титла. Егда Рим отпаде, тогда вместо Христова креста — Петров с колодкою прияша и четвероконечный крыж, а Христов истинный трисоставный — отринуша. Мы же, вернии, сие блядское мудрование римскаго костела и выблядков его поляков, еще же и наших руских никониян, за вся их нововводныя коби и еретическая мудрования по святых отец, отлучаем и анафеме предаем, и держим преданное нам от святых отец неизменно. Все любим и почитаем.

Глава 8

Обличение о новых служебниках и новой жертъве, и о просвирах и свидетельство прежних святых книг

Тайну цареву добро есть хранити, а дело Божие проповедати преславно есть. Открывая и тайну цареву — мучен бывает, а скрываяй дело Божие — сокрывшими талант — осуждение приимет. Того ради аз убояхся сокрыти злокозненнаго врага злое вымышление. Той бо зломудренный Никон патриарх церковныя догматы и уставы отеческия вся превратил, собрания пестроты от различных еретических книг и служебники новыя выходы выдал, ереси же своея с латынским крыжем, а старыя прежния святыя истинныя и непорочныя служебники и жертву со истинным крестом тричастным, по них же святии отцы наши православнии и святии пастыри — священницы служили: Киприян митрополит, Алексей митрополит и Сергия Радонежскаго. В них же положено действо на седми просвирах. А на просвирах той самый крест Христов трисоставный в лицах написан, а не крыж, по их же они служили и Богу угодили. И те святыя и богодухновенныя книги испроверже и отторже от святаго олтаря. Купно с ним и истинну от престола и от жертвенника отложил. А яже издаде он, Никон, пакостник и живаго сатаны сын, новыя своя служебники еретическия, не токмо сходны с прежними святых отец, но и со своими у него первыми выходы разногласны и несходны и в нужнейших местех везде противны и развратны. Каков есть Никон мерзок Богу и святым его, тако-вы мерзки Богу и книги его.
Поистинне, лепо есть ныне бегати от их богомерския службы и ненавидети и гнушатися неправеднаго агньца, яко истиннаго креста Христова на жертве не имеют. «Кое причастие правде ко беззаконию? Или кое общение свету ко тме? Кое же согласие Христови с велиаром? Или кое сложение церкви Божии со идолы? Вы бо есте церкви Бога живаго, яко же рече Бог. Тем же изыде от среды их и отлучитеся — глаголет Господь, — и нечистоте не прикасайтеся и аз прииму вы». Тако же и правила апостольская запрещают. Аще нечестивии держат место — да бегаеши от него, понеже ос[к]вернено бысть от них. Яко же бо преподобнии святители освящают, тако и нечестивии оскверняют. «Моляйся со отлученными — сам тако же отлучен будеши», и прочая. Но о сем должно есть возрыдати, яко волею своею той окаянный Никон и прелщенныя от него, оставиша пресветлый свет свой истинный — животворящий крест Христов, от агнца разлучили, и служебники святыя и непорочныя и дог-маты правыя отринуша. А тму прелести себе возлюбиша, низлагающе благодать и возставляют ветхая. Оставя крест Христов истинный, и сень законную, сиречь крыж латынский почетше паче истинны, и книги развращенныя и догматы богомерзския, да нас, правоверных, к своей прелести неволею влекут.
А те наши старые служебники не с латынских преложены и преведены, но з греческих древ-них переведени писменных и печатных в добрыя времена, до взятия Царяграда и до истребления греческих книг от римлян за многа лета. По них же служили Василий Великий, Иоанн Златоуст, Григорий Богослов и прочии архиереи Божии рустии вси святеи патриархи московскии: Иев, и Ермоген, Филарет, Иоасаф, Иосиф и прочии с ними святители руския по тем же служили, Господу Богу угодили, а ни в чем их не поро-чили-в до Никонова развращения и пременения и отступления.

Глава 9

О истиней жертве и непорочнем агньце свидетельство и прообразование от ветхаго закона и проч.

Ведати до есть всякому правоверному християнину, яко ветхая жертва без словесных — стень есть и образ словесной жертвы. И егда приводими бывают на жертву овчата и проч., о очищении коегождо от человека, и архиерею седящу на месте, а проч. служители закалаху животная и кровь источаху в сосуд, а мяса на жертву полагаху и кровию архиерей-иерей покропляет сосуды и приносящих дары, и тако очищение оной кровию приеляху. А без кровопролития очищение не бывает. А дважды един агнец не закалается, яко уже мертв есть. И аще о безсловесных тако есть, колми паче о словес-ных. Словесный агнец приносим бывает просвирою коегождо от человек о здравии и о спасении и яко же безсловесный агнец сотворен бысть от четырех стихий (влаг): огненой и от водной и от земленой и от воздушной, тако и просвира четыре составления имать: вода, мука, соль, квас. И тако хлеб есть совершен, да совершенным подобает и жрети Богу, есть бо мука аки тело, а квас аки душа, соль же аки ум, вода же аки дух. И животное тако приимет, животное согреваяся хлеб, хлеб же животный есть Христос. И о сем сам Господь наш свидетельствует явно, егда на вечери прият хлеб, подаде апостолом, рече: «сие есть тело мое, еже за вы ломимое» во оставление грехов. Глаголет пророк святый Иеремий аки от уст евреов: «приидите, вложим древо в хлеб его». Древо же убо, еже вложиша евреи в хлеб Христов — самый крест есть, на нем же распяша его. Яко Бог истинен бе Христос, иже распятся нас ради, тако Дамаскин в седалнях во Октаи: «на кипарисе и певге и кедре вознеслся еси агньче Божии, вземляй грехи всего мира». И святый Иоанн Дамаскин глаголет: «иде же будет знамение Христово, ту и он есть», и святое тело его сицевым образом. Яко совершен Бог — и совершен человек. И просвира имать на себе печать небеснаго царя Христа — крест тричастный и прочии страсти и лобное место и Адамов труп. (Рисунок истинного креста в круге.) Идеже труп, ту прииде орел — Христос Сын Божий и освяти кровию своею трупа онаго. И тако просвира знам[е]наема баваема от ерея, и вынимает часть в подножии креста, идеже есть труп Адамов и последи полагает в потырь в кровь Спасителеву и тако бывает очищение о нем, от них же часть вынимаема бысть. А в другой ряд части, и с тоей часта не вынимается, яко же овча закланое паки не закалается, яко мертво есть. Тако и просвирах едина дважды не вынимается, а жертва истиная приносится в воспоминание на земли бывших плотяных, на 7 просвирах, яко же в служебниках указано.
А нынешнии новые учители и преблазнители на 5-ти просвирах служат и истинный и животворящий крест Христов тричастный с просвир сняли и разлучили от агньца Божия, на нем же пожреся Хрис-тос царь и Господь славы, и кровь и воду источи во оставление грехов. И вместа того истиннаго положили на просвирах крыж латынскии двучастный широкоперый и таков образец новая просвира имать на себе сень крестную или крыж латынскии. (Рисунок «римского» креста.) Вместо истиннаго почитают сень крестную латыни и прочии таковии еретицы, низлагающе благодать и возставляют ветхая, оставя истинный крест Христов и сень законную — четвероконечный крест почетше паче истинны, паче рещи не сень, но крыж латынский и умысл дияволский. Вместо истиннаго креста Христова, крыжем печатают.
Увы како, како ослепил сатана, водими духом противным, обаче и поступки возлюбили римскаго костела и блядское мудрование выблядков его поля-ков, а свой истинный християнский возненавидели и отвергли со многим тщанием. И на просвире Предотечеве и всех святых что тараканы изгрызли 9 дир зделал, а говорят 9 чинов сил небесных, так де надобно, а над прочими двема просвирами кудесят — дир по пятидесят и болши навертит, вынимая щипком. И то есть мертвая жертва. А егда части вынимает о здравии и о спасении, Бога не молят, токмо рекут: «помяни Господи имя рек», и не токмо в проскомидии, но и всю божественную литоргию в действе и в молитвах и ектиниях? весь чин святых отец преданный превратили и пременили и многия стихи и тропари отставили, а иныя вновь прибавили. А молитвы архиерейския вон выкинули. Причастныя молитвы и по причащении многия отставили. И все церковное пение на всех службах нарушили и пременили на свой разум богопротивно.