ДРЕВЛЕПРАВОСЛАВИЕ. Форум старообрядцев всех согласий

Не малыя убо зари истиннаго разума надѣемся восприятии, аще прочитаемъ благораузмно вѣтковскихъ отецъ здѣ положенная посланiя; познаемъ добрѣ, каковы главы сiи, едина другой не покоряющыися; уразумѣемъ не твердое ихъ бытии основанiе; научимся зыблющихся основанiй удалятися и изыскивати твердое основанiе. Аще бо сiи знаменитыхъ и первосѣдательныхъ отецъ своихъ повелѣнiя не хранятъ: что о прочем надѣятися?

Вопрошахомъ убо не единого послѣдующихъ имъ, на коемъ соборныя церкве преданiи толкая ваша вѣрность, толикая надежда отцемъ своемъ в послѣдованiи утверждается? Отвѣщеваютъ: отцы наши такъ творили и творити насъ научили сице. И егда на сей паки вопросъ задаемъ имъ: отцы ваши сie и ciе по коему писанiю творили? Отвѣщеваютъ: мы сего не вѣмы; токмо вѣмы, яко Богъ тѣлеса ихъ по смерти въ нетлѣнiи прославилъ. Аще бы они не писменно себе и прочихъ водили, то тако бы нетлѣнiемъ симъ почтилъ; а яко тако Богомъ прославлении, несумѣнно имъ послѣдуемъ. Что же они творили и како научили: ни единъ взглядъ на се имутъ.

Представляютъ убо мощи Ѳеодосiя, и тѣми свое согласiе выхваляютъ; а что Ѳеодосiй предаетъ, то ни зачто кладутъ. Аще бо похвала васъ и отецъ вашихъ, древнихъ отецъ вашихъ, нетлѣнiе: то чего ради преданная ими не храните? Почто в тѣхъ велiе презорство имате? Хвалите убо словомъ, вещiю же хулите; гладите единою рукою, а другою биете. Почти инъ путь вы и отцы ваши, по Ѳеодосiи бывшiи, возъимѣсте и ино разсужденiе воспрiясте? Древнiй отецъ вашъ Ѳеодосiй отъ общаго разсужденiя научалъ послѣдующихъ себѣ смиренiю и доброму соглаciю, дабы дiаконовыхъ ни в чемъ не гнушалися, но якоже вѣтковское, тако и дияконово согласiе во всемъ равно имѣли; а отдѣляющихся ихъ и гаждающихъ осуди дерзости погрѣшительныя бытии, о чемъ посланiе его писанное в нижегородскiя скиты лѣта ǂЗСИI съ подписанiемъ рукъ, вѣдати подаетъ.

Послѣ же сего, в лѣто ǂЗСКИ-е вѣтковскiй архимандритъ, по совѣту братiи, в разныя слободы о дiаконовыхъ, ни единъ взглядъ Феодосiя имѣя, писа, но гаждая. Подобнѣ же еще отъ всего вѣтковскаго монастыря писаша посланiе в лѣто ǂЗСЛВ-е за подписанiемъ же рукъ, далеще отступающее отъ разума Ѳеодосiева, дiаконовыхъ злѣйше арiанъ нарицающе. А наипаче сихъ еще полное посланiе, писанное в лѣто ǂЗСЛЕ во Избынь, съ тяжкимъ отъ Вѣтки прикахомъ, дабы до конца дiаконовыхъ, послѣдующiи имъ, облюдалися.

И по сихъ всѣхъ предложенныхъ явѣ есть, яко не токмо вы, но еще отцы ваши въ послѣдованiи отца древняго Феодосiя ученiе и повелѣнiя отринуша и ни во что положиша. И отъ лѣта ǂЗСКИ донынѣ, аки по лѣствицѣ отъ разума Ѳеодосiева къ земнымъ сходящее, в долния вещи снидосте и токмо имя, а не дѣло Ѳеодосiево обносите, яко же и сами себе дознати можете; ибо единъ другаго предварясте въ вещехъ земныхъ: въ славѣ, въ покои и небреженiи и прочая, въ нихъ же наипаче духовнiи наши погружении, яже сущия вины ересей. И еще Ѳеодосiя отца своего глаголете! Дѣло васъ показует, яко нѣсте сынове онаго Ѳеодосiя, о чем внятно прочтенiемъ посланiя ваша являют

Предложивше собранная посланiя главнѣйшихъ членовъ вѣтковскаго согласiя, на нихъ же народи сiи уповаютъ, просимъ коегождо читателя и слышателя благоразумна, да скажетъ намъ коего отецъ здѣ правое ученiе: Ѳеодосiя ли, или по немъ бывшихъ? Аще же кто обоя возглаголетъ правого ученiя, неразуменъ фвится; ибо благословляти и проклинати, почитати и безчестити нѣсть едино, но далече едино другаго. Не просто полагали выше положенная; ибо въ основанiе кладется вѣрнымъ, да всякъ разумѣяй и творяй тако спасется; аще ли кто оная словеса аки в зимѣ Мотыку положитъ: не потреба и глаголати ихъ наставниками и отцами своими, самоотеченъ и самоучитель пребывая. Аще ли глаголати их: отцы наши, отцы наши, - то покажи отца своего дѣломъ, а не словомъ нареченiе. Но отцы ваши разно ученiе показаша. Ѳеодосiй повелѣ вамъ дiаконовыхъ, якоже каженiе, тако и вся свяшеннодѣйствiя равно с вѣтковскими вмѣняти. По Ѳеодосiи же бывшiи отцы ваши вопреки написаша, повелѣвающе дiаконовыхъ якоже каженiе, сице и вся ихъ священнодѣйства отриновенна вмѣняти и еретически бытии глаголаша. И зрите коль велiе между Ѳеодосiемъ и между по немъ бывшими отцы разнство въ преданiихъ ихъ обрѣтается: ибо единъ отецъ о дiаконовыхъ учитъ народ православными вмѣняти, а по немъ бывшiи отцы учатъ той же народъ дiаконовыхъ за еретиковъ вмѣняти. И не единою, но многажды, отъ лета ǂЗСКИ-го до самого разоренiя Вѣтки, единъ надъ другаго гажденiемъ на дiаконовыхъ взаимашеся.

И стало быть сiе преданiе обдержное, а не мимо идущее, но подтвердительное руками. Здѣ дадите намъ слово: коего разньства во ученiи отцы ваши? Онiи ли, иже дiаконовыхъ за православныхъ вмѣняти повелѣша; или тiи, кои сихъ за еретиковъ вмѣняти повелѣша: ее можетъ бо здѣ, имѣяй чувство разсудительное, глаголати: единаково ученiе. Ибо по наученiю коея страны: аще кто правовѣрныхъ вмѣняти будетъ за еретиковъ потребится, такоже и еретиковъ вмѣняяй правовѣрными, умретъ, съ еретики будет. Нѣсть бо се мало разньство во ученiи, но велико и самое дущи касаемое, - вещь во истину ужасна. Ибо по симъ выкладамъ: аще право есть ученiе Ѳеодосiево, то Вѣтки отъ лѣта ǂЗСКИ-го ученiе наста неправо, а Ѳеодосiевъ разумъ погибе. И послѣдуяй второму ученiю, всуе Ѳеодосiевымъ нетлѣнiемъ хвалится, его же Ѳеодосiй за ино ученiе ненавидитъ; ибо сицевая похвала и у Барняъ о мощехъ Николиныхъ; но не сея ради вещи и равни суть Баряне Николѣ. Вѣтковская церковь, яко нѣкое зерцало, всѣхъ въ себѣ воображаетъ, сама же себѣ не видитъ; всѣхъ согласiй судитъ, каково дiаконово, каково Епифанiево, сказуетъ и учитъ; а себе, яко древнихъ отторжеся обычаевъ, не разсмотряетъ. Той не вѣритъ сему, что творитъ не хощетъ, да извѣтомъ невѣрованiя свободенъ отъ того дѣла будетъ.

Предисловие к Ветковским посланиям