Преп. Максим Грек, слово 28, ко смеющым трищи глаголати аллилуия, чрез предания церковнаго, а четвертое: слава тебе Боже.
Предание изначала прияхом апостольское и отеческое равне списанне преданным нам православным догматом блюсти, и апостольская и отеческая, ненаписана церковная предания, непретворна: уставы отеческия преставляти несть твердо. Глаголет Соломон премудрыи. И блаженный Павел: хвалю же вас, братия, яко держите моя предания. Многим бо сущим и различным церковным преданиям.
Единою от них есть древнее предание, еже дважды глаголати аллилуиа и посем приглашати слава тебе Боже, в псалмоглаголаниях. И к таковому церковному обычаю первыи блаженныи Игнатии Богоносныи научен бысть от самых бесплотных ангельских сил, егда явишася ему, по Божию всяко строению, поюще псалмы на два лика разделени. Како убо нецыи смеют претворити ангелы преданное сие старое церковное предание, трищи глаголаще аллилуия, а в четвертое приглашати слава тебе Боже. Но негли оно рекут, яко в Божественней Апокалипсии сице есть писано святым Иоанном Евангелистом. Ксему же их противоположению, оно первие реку к ним: что же о сих не ведяху ли явльшиися божественнии ангели блаженному Игнатию, еже во Апокалипсии четверогубное, а не трегубное, якоже вы глаголете аллилуия; Ей, всяко ведаху. Тии же бо и тогда сие воспеша на небесех седящему на престоле Богу. Чесо убо ради сице предаша пети блаженному Игнатию, а не якоже в Божественней Апокалипсии содержится; но всяко не думеетеся ко ответу, аз же разрешу вам сицевое недоумение, разумеите убо прилежно. Яко в Божественней Апокалипсии, сего ради четырежды воспето бысть аллилуия: ельма же три тамо чинове видятся, воссылающе вышнему хвалу. О нем же нечестивых град Вавилон великий огнем опепели и до конца истребил есть. И первый чин поющих, иже глаголется глас велии на небеси народа глаголящаго: аллилуиа.
Начало пению сие сотворь, тойже и конец, еже и второе глаголется во Апокалипсии аллилуиа. А третие аллилуиа вторый чин поющих и поет: сие же суть двадесять и четыре старцы. И яже о владычнем престоле четыре четверообразна животна. А четвертое аллилуиа третий чин поющих глаголет, иже именуется глас народа великаго, аки глас вод многих. И первый убо чин славословит вышняго, о немже отмщение сотворил есть рабом своим, избиенным его ради, истребив до конца град нечестивых. Вторый же чин, поклонившеся седящему на престоле, запечатлев пение перваго чина, тем аминь аллилуиа. Третий же чин возглашает четвертое аллилуиа, о нем же истребленным бывшим нечестивым, воцарися Господь Бог Вседержитель. К сим же и оно приметите прилежно, яко тамо кийждо чин единою припевает, еже аллилуия, а не дващи, ни трищи, зане един есть Бог Святая Троица, якоже единым поклонением поклоняема бывает, сице единою аллилуиею славословится. Но негли к сим речете противящеся нам и глаголюще: и аще сия сице есть, чесо ради и вы не единою, но дважды возглашаете вышнему аллилуия, а третие слава тебе Боже; К сим оно воспеша на небесех по единому еже аллилуиа. Сице и в сущей на земли апостольстей церкви трие чинове суть.
Первый чин священником, и от лица их первое аллилуиа: вторый чин преподобных инок, от лица их второе аллилуиа: третий же чин православных верных мирян, их же от лица припевается сице: слава тебе Боже: еже есть сказательно сея аллилуиа, что бо есть у нас, еже слава тебе Боже, то есть у евреех аллилуия. К сим еще и оно глаголем к вам, яко сие сице глаголем: соблюдающе прилежно преданный от самех святых ангел обычай блаженному Игнатию, егда явишася ему поюще божественныя псалмы, да не ко прочим нашим согрешением и аки презирателие и преступницы отеческих преданий осудимся. Вы же что к сим противу отвещаете, или кое праведно показание творите; яко и богоугодне и добре мудрствуете, сие и глаголете. Нам бо тверде сие ведомо есть, яко супротив отеческих преданий и самех святых писаний носитеся и себе самех и иных прельщаете.
Но негли глаголете, яко святая Божия Церковь, яже в ветхом Риме сице держит и возглашает. И аще сице глаголете, явствене исповедуете себе самех причастникох сущих латынския паче части, а не святыми апостолы преданнаго неблазненнаго благоразумия. Судите убо сами, аще полезно и спасительно есть вам, еже со зловерными латины и папою пети Святую Троицу, а не со благоверными, проповедующими слово евангельския истины, четырмя патриархи православными.
Аще же римскаго папы сана стыдящеся, сице возглашаете, еже аллилуиа. Время уже вам, о предобрии, и прочим церковным папиным обычаем соглашати. Истее же рещи ересем, и по всей святей четыредесятницы, даже и до великия субботы молчати, еже аллилуиа: понеже и он молчит е.
Такоже и живоносное Спасово воскресение с ним совершати, в 3 час великия суботы, и глаголати с ним не якоже от отец прияхом мы и глаголем: Христос воскресе из мертвых, смертию на смерть наступив и бывшим во гробех живот дарова: но глаголати, якоже папа поет, тако: Христос воскресе из мертвых, аллилуиа трижды. Ниже в квасней просфире, но во опресноце, якоже он совершати священную тайную службу: ниже проскомисание потребно мнети, понеже ни он нужно мнит: ниже ектению, ниже и приношение и различныя молбы, ниже выход с евангелием, ниже перенос частных даров от жертвенника в Божественный олтарь.
Но сия вся отставити, аки излишна и папе не потребна. Ниже теплоту вливати во священный потир, понеже ни он вливает, но трижды вдыхати в потир, якоже он. Ни изрядно возглашати, ни Достойно есть яко воистину пети, ни кенаники, понеже ни он, ниже в начале священныя тайныя службы возглашати: Благословено царство Отца и Сына и Святаго Духа, но глаголати вам с ним: во имя Отца и Сына и Святаго Духа, аминь.
Ниже отпуск прочее творити, якоже прияхом от божественных отец, священнику глаголющу к верным людем: Христос Истинныи Бог наш, и прочая, но отпущати, якоже папа отпущает, глаголя, обращаяся к людем: идите совершися. Минейже и октайки, и каноны, и стихеры, и самогласны, и догматики, и тропари, и кондаки, всегодное украшение и наслаждение духовное святыя апостольския Божия церкви, отверзите прочая и непотребна мыслите, понеже и папа не требует, ниже приемлет их. Аще же сия вся странна и безместна, и слуху благоверному никако же приятна есть, и видятся нам. Да держим крепце священныя предания блаженных апостол, и возсиявших по всей вселенней богодухновенных отец наших, повинующеся божественному апостолу Павлу, глаголющу: тем же убо братие и держите предания наша, им же научистеся или словом, или посланием нашим.
И инде тойже: в научения странна, и различна не прилагайтеся. Да не прельщаемся убо саном папиным, ниже да внимаем отнюд преухищренных хитрословием, глаголемых докторов, да не с ними явимся, хуляще в самех главизнах правых догмат непорочныя веры христианския. Али нам мало видится прегрешение и осужение, еже паче устава, и страшных клятв всех священных вселенских соборов, прилагати с папою во исповедании православныя веры, еже и от Сына происхожение Святаго Духа: виновна мудрствующим и Сына Божеству Всесвятаго Духа, паче евангельскаго Богословия, объявленнаго самем Богом Словом и кроме всех вкупе вселенских собор, и богословцев учителей; Такожде мало ли нам ся кажет хуление, еже с папою мудрствовати огнем чистительным очищатися беззаконная деяния, беззаконно и богомерзко живших грешных и тако прейти им в живот вечный.
И наипаче неумытному судии, явственне во Святом Евангелии, глаголющу: и изыдут благая сотворшии в воскресении животу, рекше в живот вечный и царство неколеблемо, а сотворшии злая, сиречь, иже по всему житию своему беззаконновавшии и не покаявшеся, достойне своих беззаконий, в воскресение суду, рекше, осужению и нескончаемыя муки, по глаголющему Божественному гласу: идите от Мене проклятии во огнь вечный, и прочая. И паки: и отъидут праведные убо в живот вечный, а грешники в муку бесконечную, а не во огонь, очищающ грехи. Лучше убо нам всяким образом поминати всегда притчи Спасовы, яже о богатем и нищем, и с патриархом Авраамом мудрствовати и глаголати со дерзновением: чадо, помяни, яко восприял еси благая твоя в животе твоем, такожде и нищий сей Лазарь злая своя: и ныне сей утешаем есть, ты же болезнуеши, но и промежь вами же и нами пропасть утвердися превелия, и прочаго горькаго, увы, ответа онаго.
Научившеся убо сим малым писанием от части, какова странна и безместна суть папина учения и обычай. Берегите себе крепце от ереси папы римскаго, и от хитрословия единомудренных ему, глаголемых докторов, иже прельстиша многих малоумных и еще прельщают всяким образом внешняго учения: не внимайте хитрословием их, держитеся отцепреданнаго православныя веры в простоте и в беззлобии сердца, пиюще нелестное млеко, непорочныя невесты небеснаго жениха Исуса Христа Истиннаго Бога, Тому слава и держава во веки веком, аминь.
|
- участник сейчас на форуме