ДРЕВЛЕПРАВОСЛАВИЕ. Форум старообрядцев всех согласий

Поучение Григория Нисскаго о исповедающихся. иже истиною хотящему приити на исповедание ко отцу духовному.
Сице подобает явственно исповедати вся своя согрешения, отнележе родися, и в память прииде. и в которыя грехи впаде. или во младенческом неразумии. или в возрасте в тридесяти летех. или по тридесяти летех. или в старости. и в колики грехи впадеся. прежде ли мысля на грех, и по падении мысля тоже. или в напрасньстве случися грех. или во едином гресе много лет пребысть. и со многими ли падеся, с мужеским ли или женьским полом. или чрез естественая согрешения впадеся. или с четвероногим. в пиянстве, или натрезве бысть. и колико время в том пребысть, не исповедаяся отцу духовному. и по исповедании колико согреши. или заповеданныя ему епитимии преобиде. и вся явственно исповедати. и лиц различая, и мест разньства, разве имени. видех бо некия приходящая на покаяние, и своя согрешения исповедающа сице: блудник есмь, и прелюбодей. и во всем есмь согрешен. увы таковаго неразумия и погибели душевныя; Сицевым бо елицы своя согрешения списанием исповедающе. и како и в коя согрешения впадоша, вся исповедати явственно, и лица и места. егда бо душа от тела разлучится, и преходит мытарьства на воздусе. и тацы убы тамо злы, воздушнии князи тмы председящии а аере бесове, и предносяще свитки. в нихже суть написана согрешения убогия души. где согреши, и с кем падеся. и в которое лето и время. и день, и нощь, и час. и аще будет покаялася душа чисто отцу духовному, и от него не скры ничтоже, и человеколюбием Божиим невидимо заглажены обретаются согрешения. ащели не исповедалася чисте, то вся явствена суть согрешения. и немощно от них скрыти ничтоже; И сего ради о отцы духовнии, испытовайте грехов. или будет нуждею, или волею сотворени. вопрошайте же времени и места и лиц. и по тому исповеданию, и епитимию давайте, или запрещение; Достоит вам отцем духовным испытовати исповедающагося мужа или жену. и не срамлятися отцу чад, ни чадом отца. суть бо нецыи отцы, иже не испытовают срама ради чад своих. ни паки они не исповедают срама ради, и сами ся погубляют в неразумии; Да не мозите срамлятися, но истязуйте многоплетенное кровосмешение, и различная согрешения. несть бо един грех, ни два, ни три, ни 4, ни 5. но случается и с двема сестрама. и ино есть еже отцов род, и ино материн. и приводит ненавистник добру диявол, брата с сестрою, мать с сыном. отца со дщерию, свекра с снохою. тещу с зятем. и два брата с единою женою. и с братними чады, и в кумовстве. и в побратимстве. и с чернцом и с черницею, и с схимницею. и со скотом чистым, и не чистым, многоразличная согрешения суть. друзии же паки чары деют. удавления. отравы. житовабства. и татие и разбойницы, и все поряду испытовати. Ведати достоит пресвитеру, како приимати пришедшаго к нему ко исповеданию. и вопросити всего прежде кающагося, бывал ли он у отца духовнаго. и будет бывал, то распросити, не дал ли ему отец духовныи епитимии. и будет скажет что дал. и распросити, за каковыи грех дал. и будет не разрешил его отец, и ты смотри совести греха. и исправился ли он хотя мало в запрещении, или не исправился. и будет возможно, и он бы от прежняго отца духовнаго разрешение получил. Аще жив будет отец давыи запрещение, то от негоже просити разрешения. а ко иному отцу духовному без разрешения и отпущения не ходити. Аще ли кто случится, и в запрещении, а изволит отец его духовныи отпустити удаления ради, или иныя некия потребы. то новыи духовник по исповедании, подаст исповеднику разрешение по разсуждению. Ащежели гордостию и непослушанием, от прежняго отца духовнаго идет прочь, то ты не примай его. разве смертнаго часа. А кто истинно все скажет, а отец духовныи прежнии его по своей слабости, или по грубости ума. по правилом святых апостол и святых отец, не исправил его епитемиею. и аще видиши совесть его люту и тяжку зело, то ты исправи его и разсматривай от писания, плодов его покаяния. мнози бо от невеждей и от злоделателей видяще, яко не запрещают им, ни связуют их епитимиями отцы их. и того ради прилагают грехи на грехи; Ты же иерею святых апостол и святых отец правилом внимай, и бегай тмы неразумия, и лености. яко Бог в разуме согрешающих, зле хощет мучити. и бежи ямы тоя, в нюже слепец слепца водяи впадаются; Еще же и се не забуди, аще скажет яко брань имеет с кем, или гнев на кого, а будет сам виновен, то прежде вели смиритися. и потом во общение приемли;

http://vasvol.livejournal.com/19425.html?mode=reply